Marin Mema mbushi Galerinë e Qendrës për Kulturë-Ulqin. Paralajmëroi botimin e librit! -

Qendra për Kulturë – Ulqin ka përmbyllur aktivitetet kulturore për vitin 2024, duke ftuar në Odën e së vërtetës gazetarin e njohur shqiptar, Marin Mema, i cili me shumë vlerësim për Ulqinin dhe banorët e këtij vendi, pranoi të ishte pjesë e këtij aktiviteti.

Në Galerinë e mbushur përplot, Gazmend Çitaku në cilësinë e moderatorit, zhvilloi bisedë me të ftuarin lidhur me tema të ndryshme, duke i dhënë një fokus të veçantë trashëgimisë tonë kulturore, ruajtjes së saj nga shkatërrimi e përvetësimi, gjurmët shqiptare që gazetari Mema ndjek përmes emisionit të tij, gjendja e shqiptarëve etj.- thuhet në publikim e Qendrës për Kulturë-Ulqin.

Në vazhdën e mendimësisë së tij të skalitur mirë, gazetari Mema, theksoi se vështirësia më e madhe ndër shqiptarët qëndron në krijimin e një mozaiku të plotë ku shqiptarët si individë të suksesshëm do të bashkoheshin si një grup për të vepruar të gjithë bashkë. Midis të tjerash, tregoi se në planet e tij të afërta është botimi i një libri që do të përmblidhte fakte të rëndësishme që ka arritur të zbulojë gjatë punës së tij afatgjate, theksohet në publikim.

Në fund, të pranishmit patën mundësinë që të shtrojnë pyetje për të ftuarin, kurse drejtoresha e Qendrës për Kulturë – Ulqin, Adriana Hoxha, në shenjë mirënjohjeje dhe falënderimi, i dhuroi të ftuarit një pikturë të artistes së re nga Ulqini Emina Nimanbegu.